ថៃ៖ អាជ្ញាធរបានឱ្យដឹងនៅថ្ងៃទី២៧ ខែធ្នូម្សិលមិញនេះថា ទឹកជំនន់នៅភាគខាងត្បូងប្រទេសថៃ បានសម្លាប់មនុស្សយ៉ាងហោចណាស់ ៦នាក់ និងបង្កផលប៉ះពាល់ដល់មនុស្សរាប់ម៉ឺននាក់ផ្សេងទៀតក្នុងតំបន់។ មន្ត្រីក្នុងតំបន់ក៏បាននិយាយថា ទឹកជំនន់ដែលបានកើតឡើងតាំងពីថ្ងៃទី២២ ខែធ្នូ បានធ្វើឱ្យប៉ះពាល់ដល់លំនៅដ្ឋានប្រមាណជា ៧ម៉ឺនខ្នង នៅបណ្តាខេត្តជាច្រើនដូចជា ខេត្តសាថន, ខេត្តសុងខ្លា, ខេត្តប៉ាតានី, ខេត្តយ៉ាឡា និងខេត្តណារ៉ាធីវ៉ាត់។
អភិបាលរងខេត្តណារ៉ាធីវ៉ាត់ លោក ព្រីឆា ណួលណយ បានប្រាប់មកកាន់សារព័ត៌មានថា មានមនុស្ស ៦នាក់ ក្នុងនោះមានស្រ្តីចំណាស់ម្នាក់វ័យ ៨៩ឆ្នាំ និងនិងទារកទើបចេះដើរម្នាក់បានស្លាប់ក្នុងខេត្តណារ៉ាធីវ៉ាត់។ លោកបន្តថា មនុស្សម្នាក់ទៀតនៅបន្តបាត់ខ្លួនបន្ទាប់ពីមានភ្លៀងធ្លាក់ខ្លាំងជាច្រើនថ្ងៃ ដែលបានបង្កឲ្យមានជំនន់ទឹកជន់ឡើងដល់កម្ពស់ ៣ ម៉ែត្រនៅតំបន់មួយចំនួន។
បើតាមខ្សែវីដេអូប្រព័ន្ធផ្សព្វផ្សាយក្នុងស្រុកបានបង្ហាញនូវរូបភាពផ្លូវដែលលិចលង់ដោយទឹកជំនន់ និងរូបភាពនៃប្រជាជនដែលជម្លៀសខ្លួនឡើងទៅលើដំបូលផ្ទះដើម្បីរង់ចាំការសង្គ្រោះ។ ភ្លាមៗផងដែរ ក្រុមសង្គ្រោះជាច្រើនក្រុមបានចេញប្រតិបត្តិការភ្លាមៗក្នុងគោលបំណងផ្តល់ទឹក និងអាហារមួយចំនួន ព្រមទាំងរុករកតាមទីតាំងសំខាន់ៗដើម្បីស្វែងរកក្រែងលោមានការជាប់គាំងមនុស្សនៅខាងក្នុង។ នាយកដ្ឋានបង្ការ និងកាត់បន្ថយគ្រោះមហន្តរាយថៃ បានរាយការណ៍ថា កម្រិតទឹកបានថយចុះទៅវិញហើយនៅថ្ងៃពុធម្សិលមិញ។
ប្រភពពីមន្រ្តីបានឱ្យដឹងថា សេវាកម្មផ្លូវដែកមួយចំនួននៅក្នុងខេត្តណារ៉ាធីវ៉ាត់ដែលជាប់ជាមួយប្រទេសម៉ាឡេស៊ីបានដំណើរការឡើងវិញហើយ បន្ទាប់ពីបានផ្អាកដំណើរការប៉ុន្មានថ្ងៃដោយសារការខូចខាតមួយចំនួនលើខ្សែរត់។ គួរឱ្យដឹងថា ជារៀងរាល់រដូវវស្សានៅក្នុងប្រទេសថៃតែងតែមានភ្លៀងធ្លាក់ និងទឹកជំនន់ស្ទើររៀងរាល់ឆ្នាំ ខណៈអ្នកវិទ្យាសាស្ត្រនិយាយថាការប្រែប្រួលអាកាសធាតុដែលបង្កឡើងដោយមនុស្សអាចធ្វើឱ្យមានស្ថានភាពភ្លៀងធ្លាក់កាន់តែខ្លាំងឡើង។ គួររំឮកថា កាលពីឆ្នាំ២០១១ ក៏ធ្លាប់មានភ្លៀងធ្លាក់ខ្លាំងបង្កជាទឹកជំនន់រហូតដល់មនុស្សរាប់រយនាក់បានស្លាប់ និងខូចខាតផ្ទះសំបែងរាប់លានខ្នងនៅទូទាំងប្រទេស៕
